الخميس، 3 سبتمبر 2009
ايون فعلا العنوان صحيح
حضرتي وبلا فخر اشتغلت مدرسه
ايون اشتغلت مدرسه فرنساوي في مدرسه لغات
ادعولي عشان انا بجد وبيني وبينكوا كده
مرعووووووووووووووبه
وباذن الله هبتدي بعد 20 يوم
ومن دلوقتي هيبدأ العد التنازلي
لحد اليوم الموعود فادعولي بقي
وربنا يستر
وحشتوني اوي بجد
السبت، 22 أغسطس 2009
كل سنه وانتوا طيبين ياحلوين
ورمضان كريم
يارب بجد يقبل كل دعوه
وكل عباده لينا في شهر رمضان
ربنا يفرحنا ويفرحكوا كلكوا يارب
ورمضان كريم
الاثنين، 17 أغسطس 2009
ليه بجد مابتتعلميش
ليه في قلبك مابتتحكميش
ليه شايفه الدنيا كده بعيون بريئه
وفي الاخر بتكوني في بحر الحياه انتي الغريقه
لسه مستنيه ايه؟
جرح تاني ولا ايه؟
عايزه الدموع تاني في سكتك؟
ولا الالم يجرح وحدتك؟
عايزاكي من الجرح بقي تتعلمي
وتفوقي لنفسك وابدأي تاني احلمي
سيبك بقي من الخضوع
دي سكتك دي مفهاش رجوع
شوفيني انا عملت ايه
حتي الوجع قدرت ايه
فضلت ضعيفه وجالي يوم
لقيت نفسي بنهار من الهموم
وفي يوم قررت افوق
وسبت تحت وطلعت فوق
سبت الجرح والالم ورايا
خدت ضحكتي والامل معايا
وحياتي خلاص بقت تمام
لما سبتها علي رب الانام
ارجوكي من جرحي وجرحك اتعلمي
عشان ميجيش يوم علي بكره وتندمي
صدقني اتعلمي وخليكي قويه
عشان ميجيش اليوم وتبقي تلميذه غبيه
السبت، 15 أغسطس 2009
انتقل الي رحمه الله تعالي والد المدون العزيز
مصعب صلاح
وندعو الله سبحانه وتعالي ان يجعل مثواه الجنه
وادعو الله سبحانه وتعالي
ان يصبر اهله وابنائه
والبقاء لله يامصعب
ولكن هذه امانه وصاحب الامانه اخذها
وعزائنا الوحيد انه مات في ايام جميله
اللهم اجعل مثواه الجنه واغفرله
والبقاء لله
الخميس، 13 أغسطس 2009
اولا احب اشير ان القصيده دي حضرتي
مستعيراه من حضره الدكتور حوده
وده بعد مابجد عجبني حوارها اوي
واحساس القصيده
صحيح دكتورمحمود
مش كان راضي اني اشير لاسمه
بس معلش يادكتور بقي
ده حقك
وبعدين انا بعتز بالقصيده دي
اولا عشان دكتور محمود الي كتبها
ثانيا بقي عشان
اسمها بعتز بيه جدا وبحبه جدا
ثالثا وده الاهم بقي
انها بجد بتلمسني بجد
وكفايه كده بقي واقرؤا الحوار
واي تعليق يبقي موجه لدكتور محمود
صاحب مدونه اخر يوم في الجنه
وعلي فكره بجد المدونه تحفه
ومواضيعها كمان فوق التحفه
وكل سنه وكلكوا طيبين
قالت
ودمع العين يملأها
مالى اراك على البعد تصتبر
قلت
وقد جف بئر الدمع فى عينى
لم اّنس البعد فى بعدك
ولكنى على الايام انتظر
وامهل غدا كى يغدى بما يحويه
ولربما ان جاء الرد اعتبر
قالت
اوبعد ضيقى استرجى عطفا لغد
ومنه القلب يعتصر
قلت
انظرى فالغيث ياتى ليصبرنا بقطرات
ثم بعد القطر ينهمر
بوحى بهمك فالبوح ينسينا
والنفس قبلتنا فيها الملاذ
واليها نصلى ونعتمر
ورق الخريف ينسيه الزمان شبابه
ثم ما ينفك يخضر
قالت
منك الفصول تغار
ففيك شتائي وحرى
وفى بعدك ذبولى
وفالقرب اعود لازدهر
قلت
ومنك الزمان يغار
ففى بعدك تهرب الايام منه
وفالقرب يزيد العمر عمر
ذاق الزمان منك الكثير
وعلمتيه متى الوقوف ومتى السير
قالت
معك لم اعد اعى ما النفع وما الضرر
ففيك الحنان ومنك الاسى
وفى كلتيهما يهذى الفكر ويعتبر
معك تعود الروح لتحيا بعد موتها
ويهرب الخوف من يومى ويستتر
ومعى الان وعدا من الفراق
بانه غدا سياتى ليعتذر
وقد يتبدل الحال فى غدنا
وعلى البعد ننتصر
وخلصت القصيده وتوته توته
خلصت الحدوته
وطلعت زي العسل وبنتوته
يلا بقي عشان تناموا ياشاطرين
وتصبحوا علي خير ياحلوين
الاثنين، 10 أغسطس 2009
عشان ميبقاش في حد احسن من حد
وعشان اكون حقانيه انا كمان
انا حسيت بعد بوست البنات اتهبلت
ان جيت علي البنات اوي وشعرت بتأنيب ضمير
وقلت ايه ده هو انا بعمل مع بنات جنسي كده ليه
وشماته ابله ظاظا فيا؟قصدي ياشماته الشباب فينا
بما اني اكتشفت ان الافراح دي
هيا المكان الرسمي لجمهوريه العته الدوليه
فبقيت متوقعه اي حاجه
وبما ان افراحي كترت اليومين دول فاستحملوني
كنت في فرح واحده صاحبتي جدا جدا
والفرح ده بقي في بلد قريبه مننا وكده
انا دخلت الفرح وكنت الحمد لله
لابسه كل الهدوم الي حبل وكده
واتظبطت بقي ده فرح صاحبتي
رحت الفرح وحمدت ربنا ان قاريبي
مش في الفرح يعني مش هشوف هبل ولا حاجه
دخلت وكان معايا ووالدتي واختي وجوزها
يعني معايا قبيله يعني مفيش مجنون
يقدر اساسا يكلمني
دخلت الفرح كده بقي وقعدت علي كرسي
وفرحانه بقي للعروسه
اذا فجأه اتفاجئ بمفاجئ بصراحه فجأني
لقيت واحد كده جه خبط في الكرسي بتاعي
وعلبه السجاير قال ايه وقعت منه
فنزل يجبها وحضرته عمال يسبل
قلت اكيد تهيئات ده شكله حد محترم
يعني استحاله هيسبلي والقبيله دي معايا
ولقيته اخد الكرسي بتاعه وقعد ادامي
انا قلت عاااااااااادي مفيش مكان فاضي
والركن ده بقي طراوه واما براوه علي الطراوه
قلت اطلع بقي اسلم علي صاحبتي
لقيت حد ورايا
طلعت المسرح اسلم عليها
طلع ورايا يسلم علي العريس
قلت ماعلينا يمكن خايف يطلع لوحده
عااااااااادي بتحصل
وبعدين لقيته بيصور العروسه وكده بقي
وانا مالي ماكل الناس بتصور العروسه والعريس
بس لاحظت ان الكاميرا بتميل عليا
ايه ده ده بتميل بتميل بتميل وجوووووووووون
قصدي لا ده فعلا بيصورني انا
فعلي طول نزلت علي طول اروح اقعد مع القبيله
نزلت نزل ورايا قلت عااااااااااادي
وبعدين كده رحت التواليت الحريمي اظبط الطرحه
لمحته جاي ورايا
لا مش معقوله ياجماعه يدخل التواليت الحريمي
وماشيه وماشيه وجوووووووووون
لقيته سبقني
ووقف ادامي
حاولت اعدي ومش عايز يخليني اعدي
ومصر انه يكلمني
يانهار ابيض علي الرخامه ان الناس دي
وانا اساسا لو حضرته كده مات ادامي
مش هعبره اساسا
ياانسه موبايلك يانسه طب كلمه ياانسه طب عبريني
ده انت كرهتني في نفسي ياراجل
وده الواحد يتصرف معاه ازاي ده
فقلتله خلي عند حضرتك شويه احترام وخليني اعدي
بدل مااعرفك قيمتك
والبعيد مابيحسش
وقالي هتقولي احترم نفسك هقولك محترم غصب عنك
هتقوليلي معندكش اخوات بنات هقولك اه معنديش
وهقولك اني وحيد امي وابويا
وبدور علي عروسه
بس دي كل حكايتي
اه ياابن العبيطه
عرفت وقتها انه مجنون فهمي رسمي نظمي
الحل الوحيد معاه عشان اعدي
استخدام العنف واناوالله بعز العنف اوي
رفعت حاجبي كده وجبت شنطتي
وزقيته جامد بالشنطه عشان اعدي وارجع لمكاني تاني
واتعصبت جامد وقلت خلاص هروح اقول لجوز اختي عشان
الحركه الي مش لطيفه دي
بس الحمد لله مجاش ورايا
قلت خلاص بقي هو كده اخد مايكفيه
وجيت اروح بقي لقيته ساند علي العربيه
وفضل يكلم مع جوز اختي واتصاحب عليه
وانا مفروسه وهموت وافتن عليه
بس الحمد لله مسكت لساني بالعافيه
بس بجد سؤال
هما كده اتهبلوا؟
ولا مثلا ده استعباط؟
ولا ده فعلا بقت اخلاقهم خلاص؟
اي حد يحب يتعرف علي بنت
يستخدم الاسلوب المستفز ده؟
ولا هما الي صح واحنا الي غلط؟
معلش عشان كده مكنتش بحب اتعامل مع شباب
في الكليه والثانوي
كنت بقول دايما بحس انهم كائنات رخمه
معلش بقي محدش يزعل مني
بس فعلا انا مستغربه هما اخلاقهم بقت كده ليه؟
بجد حد يجاوبني
الاثنين، 3 أغسطس 2009
هضحك عمري ماهزعل تاني
هفرح والدنيا معنداني
هو انا غاويه جراح وخلاص
ان عايزه افرح زي الناس
بس انا فاكره مره ضحكت زمااااان
بس الفرح كمان كمان بكاني
ساعات بلاقي الدنيا حلوه
وكل حاجه بشوفها حلوه
وفي لحظه بفتكر الي راح
دموعي تنزل غصب عني
وقلبي يصرخ جوه مني
تعبت اغني علي الجراااااااح
هو انا غاويه جراح وخلاص
انا عايزه افرح زي الناس
بس انا فاكره زمااااااااااان فرحت
بس الفرح كمان بكاني
هضحك عمري ماهزعل تاني
هفرح والدنيا معنداني
عجبتني اوي الاغنيه دي
سمعتها اوي وحسيتها اوي
بس بامانه مش عارفه مين الي كاتبها او الي بيغنيها
بس فعلا حسيت بيها
حسيت اني لازم اضحك
لان البكاء مش هيفيد باي حاجه
اضحك واتمسك ببكره
واتفائل واقول ان بكره اجمل
عشان ربنا جمبي وبيحبني
بكره اجمل ولو حتي مش اجمل
يبقي اسمي ضحكت شويه صغيرين
قبل ماابكي تاني
فخلاص بجد هضحك
بجد هسيب اي حاجه تزعلني ورا ضهري
بجد خلص انا قررت ده
قررت وقت البكاء اضحك
وقت الازمه اضحك
وقت الفرح اضحك
ويبقي كده ضحكت علي الدمع والحزن
بس يارب اعرف اضحك
;;
Subscribe to:
الرسائل (Atom)
m.jpg)
