الاثنين، 10 أغسطس 2009
عشان ميبقاش في حد احسن من حد
وعشان اكون حقانيه انا كمان
انا حسيت بعد بوست البنات اتهبلت
ان جيت علي البنات اوي وشعرت بتأنيب ضمير
وقلت ايه ده هو انا بعمل مع بنات جنسي كده ليه
وشماته ابله ظاظا فيا؟قصدي ياشماته الشباب فينا
بما اني اكتشفت ان الافراح دي
هيا المكان الرسمي لجمهوريه العته الدوليه
فبقيت متوقعه اي حاجه
وبما ان افراحي كترت اليومين دول فاستحملوني
كنت في فرح واحده صاحبتي جدا جدا
والفرح ده بقي في بلد قريبه مننا وكده
انا دخلت الفرح وكنت الحمد لله
لابسه كل الهدوم الي حبل وكده
واتظبطت بقي ده فرح صاحبتي
رحت الفرح وحمدت ربنا ان قاريبي
مش في الفرح يعني مش هشوف هبل ولا حاجه
دخلت وكان معايا ووالدتي واختي وجوزها
يعني معايا قبيله يعني مفيش مجنون
يقدر اساسا يكلمني
دخلت الفرح كده بقي وقعدت علي كرسي
وفرحانه بقي للعروسه
اذا فجأه اتفاجئ بمفاجئ بصراحه فجأني
لقيت واحد كده جه خبط في الكرسي بتاعي
وعلبه السجاير قال ايه وقعت منه
فنزل يجبها وحضرته عمال يسبل
قلت اكيد تهيئات ده شكله حد محترم
يعني استحاله هيسبلي والقبيله دي معايا
ولقيته اخد الكرسي بتاعه وقعد ادامي
انا قلت عاااااااااادي مفيش مكان فاضي
والركن ده بقي طراوه واما براوه علي الطراوه
قلت اطلع بقي اسلم علي صاحبتي
لقيت حد ورايا
طلعت المسرح اسلم عليها
طلع ورايا يسلم علي العريس
قلت ماعلينا يمكن خايف يطلع لوحده
عااااااااادي بتحصل
وبعدين لقيته بيصور العروسه وكده بقي
وانا مالي ماكل الناس بتصور العروسه والعريس
بس لاحظت ان الكاميرا بتميل عليا
ايه ده ده بتميل بتميل بتميل وجوووووووووون
قصدي لا ده فعلا بيصورني انا
فعلي طول نزلت علي طول اروح اقعد مع القبيله
نزلت نزل ورايا قلت عااااااااااادي
وبعدين كده رحت التواليت الحريمي اظبط الطرحه
لمحته جاي ورايا
لا مش معقوله ياجماعه يدخل التواليت الحريمي
وماشيه وماشيه وجوووووووووون
لقيته سبقني
ووقف ادامي
حاولت اعدي ومش عايز يخليني اعدي
ومصر انه يكلمني
يانهار ابيض علي الرخامه ان الناس دي
وانا اساسا لو حضرته كده مات ادامي
مش هعبره اساسا
ياانسه موبايلك يانسه طب كلمه ياانسه طب عبريني
ده انت كرهتني في نفسي ياراجل
وده الواحد يتصرف معاه ازاي ده
فقلتله خلي عند حضرتك شويه احترام وخليني اعدي
بدل مااعرفك قيمتك
والبعيد مابيحسش
وقالي هتقولي احترم نفسك هقولك محترم غصب عنك
هتقوليلي معندكش اخوات بنات هقولك اه معنديش
وهقولك اني وحيد امي وابويا
وبدور علي عروسه
بس دي كل حكايتي
اه ياابن العبيطه
عرفت وقتها انه مجنون فهمي رسمي نظمي
الحل الوحيد معاه عشان اعدي
استخدام العنف واناوالله بعز العنف اوي
رفعت حاجبي كده وجبت شنطتي
وزقيته جامد بالشنطه عشان اعدي وارجع لمكاني تاني
واتعصبت جامد وقلت خلاص هروح اقول لجوز اختي عشان
الحركه الي مش لطيفه دي
بس الحمد لله مجاش ورايا
قلت خلاص بقي هو كده اخد مايكفيه
وجيت اروح بقي لقيته ساند علي العربيه
وفضل يكلم مع جوز اختي واتصاحب عليه
وانا مفروسه وهموت وافتن عليه
بس الحمد لله مسكت لساني بالعافيه
بس بجد سؤال
هما كده اتهبلوا؟
ولا مثلا ده استعباط؟
ولا ده فعلا بقت اخلاقهم خلاص؟
اي حد يحب يتعرف علي بنت
يستخدم الاسلوب المستفز ده؟
ولا هما الي صح واحنا الي غلط؟
معلش عشان كده مكنتش بحب اتعامل مع شباب
في الكليه والثانوي
كنت بقول دايما بحس انهم كائنات رخمه
معلش بقي محدش يزعل مني
بس فعلا انا مستغربه هما اخلاقهم بقت كده ليه؟
بجد حد يجاوبني
41 Comments:
Subscribe to:
تعليقات الرسالة (Atom)
m.jpg)
انا اول تعليق وقريت كمان
على فكرة ده غلس قوي ودهل كمان في واحد يتعرف على واحدة كده
هما الولاد كده لما يبقى عندهم فرح يضربو البدلة اللي هيه والجل ويطلعو يسبلو للبنات على أساس إننا المفروض ننهار بقى قدام الجميل اللي سعادتهم بيعملوه فينا. ياللا ربنا يهديهم
كل سنة وأنتي طيبة
أموووووووووه
اييييييييييييييييه
فينك كده لا حس ولا خبر
وحشتنى قوووووووووووووووووووى
بمناسبة قدوم شهر رمضان اعده الله عليكم بالخير واليمن والبركات
ربنا يهدى الشباب يارب للطريق السليم
ويحميهم امين يارب العالمين
مودتى
أنا قلبى كان حاسس ان البوست ده جاى بعد بوست البنات اتهبلت
هههههههههههههههه
طبعا فى الشباب الكويس و الشباب الوحش
بس الواد ده بالذات مستفز
خلينى اشوفه بس
بعض الشباب هم اللى دماغهم باظت
و ده كان تأثير البنات الهبلة على الولاد
أو تقولى تأثير الولاد الهبلة على البنات
يعنى الكل خلااااااااااااااص
بح بح
و زى ما فى كويس فى وحش
دومتى مبدعة و سعيدة دائما
اصلى احب الراجل اللى واثق من نفسيته وهو وثيق اوى شوفتى دخلته تخلى قلبك يهفهف...هو بس لو مكنش قال محترم غصب عنك كنت قولتلك توكلى على الله بس لازم يطول لسانه يعنى يدخل شمال بس بشويييييييييش,,يخبط بالعقلللللللللل..
زهقت من كتر ماشفت نماذج سيئه يمكن خير يادودو
بحبك باقمر
زيهم زي أي نوع من الناس
فيه منهم المتخلف وفيه منهم المحترم
المشكلة اللي انتي بتتكلمي عنها دي بتمثل أزمة مجتمع شرقي ، البنت فيه من كتر ما ضيقوا عليها وخبّوها في البيت ، فبقت بالنسبة للشاب حاجة زي الكنز المستحيل الوصول ليه ..
وزي ما بيقولوا : الممنوع مرغوب
بس مش كله كده على فكره
بس خلاص يعنى اكيد الراجل دا داب فى يكى بسرعه
يعنى يعمل ايه لقلبه بقى
لا و كمان ردود جاهزة على ردودك !!!!
عمر ما دى كانت الثقة فى النفس او الجرأه
ربنا يهدى الشباب دول بجد
سيبك انتى بقى
كل سنة و انتى طيبة ياقمر
استنى بس هضحك الاول وبعدين اتكلم
هههههههههههههههههههههههههههههههههههه
والله هو الى حصل حاجه من الاتنين ولا اقولك هى حاجه واحده هو اكيد وبدون كلام انتى زى القمر وهبلتى الواااااد ياعونيا وانا لو مكانه هعمل اكتر من كده بس باحترام ومش هتكلم معاكى اصلا
انا مؤمن بالتاثير من اول نظره لكن مفيش حاجه اسمها حب من اول نظره لكن التاثير من اول نظره ده موجود وده راجع لجاذبيه الانسان وتاثيره في المكان الى كااااان فيه وانت ياقمر هبلت الواد بس هو اتبع اسلوب متعجرف عاوز يتجوز مايتجوز ييجى لحد عندك في بيتك وتقوليله لا عادى يعنى هى جت عليه
ههههههههههههههههههه
بس والله فيه ناس كويسه كتير
ادام الله عليكى السعاده وربنا يوفقك
وكل سنه والاسره الكريمه كلها بخيررررر
ده شاب لتشيييييف خالص
العيال اتهبلت بجد ولا ايه
بس هو واضح انه من ايام انور وعدى ههههههه
وكمان لو مات قدامك مش هتبصيله ههههههههه
بجد حاجة تكسف....العيال مخها ضرب ولا ايه
يللا ربنا يعافينا
بس مش ممكن يكون النصيب؟
بس برافوا عليكى قدرتى تعملى حاجة بس هو بردو طلع غلس ههههه يا خوفى ياديالا لا يكون ناوى على حاجة هههههه
دمتى بكل الخير والسعادة
ازيك يا دودو عامله ايه
كل سنه وانتى طيبه ياقمر
وطبعا اكيد الشباب هبله
من يومها هههههههههههههه
مش لسه ها
بوست زى العسل ربنا يسعدك يارب
ايه التباته دي
فيه حاجه اسمها كده
رخم رخم يعني
بقولك ايه
ماتديني نمرتك يا انسه
دا انا حتي واحيد امي وابوايا
ماعنديش غير 7 اخوات بس
د
وبدور علي 3 عرايس
الهبل موجود والعقل موجود
الاحترام موجود وقلة الادب موجوده
هيا دى الدنيا
بس خلاص
تحياتى
يارافعة راسنا ياديالا
والله هبل الشباب ماشاء الله لا يعد ولا يحصي
بس برضو نرجع نقول ان مش كل الشباب
"علشان اخواتنا هنا ميزعلوش مننا"
اكيد في ناس محترمة
ربنا يكرمهم
بس شكلك كنتي قمر يا ديالا في الفرح
يبقي الشاب ياعيني غصب عنه بقي
هههههههههه
طرحك للموضوع جميل وخيفي كمان
ربنا يكرمك
سلام
والله وبيحصل أكتر في رخم بيخلي حد وانت حنب العروسة يصوره وهو جنب العريس وجوووووون من غير ما تحسي طلعت في الصورة وانت كانك بتتصوري انت وجوزك مع العروسة مش فاهمة ايه ده بجد
تعرفي أنا عندي خاتم ماما مش بتحبه عشان لما بيتلف بيبقى شبه الدبلة بحب البسه قوي في الافراح وألفه D:
اوعي آجي المرة الجاية ألاقيكي بتقولي
الرخم ده بقى خطيبي :))
ربنا يهدي الجميع يارب
الله يحظك يا ديالا انتى نتكه انا ما بطلتش ضحك وأنا بقرأ البوست
بس أنا زعلان على الشتيمه اللى فى الأخر دى انتى عممتيها
وبعدين ما انا قلتلك كده فى البوست اللى فات زى ما فيه بنات رخمه وتبته ودمها تقيل فى ولا أرخم وبعدين الرخامه عند الولاد لها أصول بقى يعنى البنات تحسى ان هما بيصتنعوا الرخامه أما الولاد دول أساتذه ورؤساء قسم الواحد بيبقى هاين عليه يطلع من هدومه لما يشوف حاجه زى كده
اللهم اهدى شباب المسلمين
وانا اجى اطلع مصارينه من بطنه اخليها تخش فى عنيه اطلعها من مناخيره
اصل انا دموى اوى
هع هع هع هع هع
منورة دايما يادديالا
على فكرة انا وجهتلك دعوة على مدونة نجاح فى نجاح ياريت تشوفيها
مصرى دائما
وعايز اقولك كمان حاجه صوابعك مش زى بعضيها اكيد فهمانى سواء كان صبيان ولا بنات تحياتى اخوكى مشمش
ههههههههه رديتى اعتبارنا الحمد لله
بس على اد ماهو رخم ومستفز بس لذيذ ههههههههه مش بيستسلم
شكلنا هنحضر خطوبة قريب (وش بيغمز)
تحياتى ليكى يا قمر
-----------
ههههههههه
مفيش بنت مش بتتعرض لموقف كدا
بس تعرفي
ساعات بيكون واحد غرضه شريف
هههههه
بس مدب ومش بيعرف يتصرف
ويقول ايه بقى لو الفرح خلص مش هعرف اشوفها تاني
فخير البر عاجله
ربنا يحفظنا
تقريبا ده اول تعليق ليا عندك
مع اني متابعه من فتره
تقبلي مروري
تحياتي
معلش هى بتبقى طريقة فى التعامل
فاكر انه كدة هيبين لك انه راجل جرئ وبيعمل ا للى هو عايزة وشجاع بقى والجو دة
انما بجد هو غلس اوى
شرفتينى بزيارتك وكلامك الجميل
ومبسوطة جدا انى عرفت مدونتك
انا التعليق الواحد وتلاتين وافتخر
مساء الخير عليكم جميعا فى برنامج
الضيف التنح الرخم
وضيفنا النهارده هو واحد تنح كان بيكلم ديالا
اولا نبدا
اسم حضرتك ايه يا استاذ تنح
احم احم
انا اسمى هيثم وبيدلعونى يقولولى يا ثومه
هممممممممم
طيب يا عسول
وانت وحيد بابى ومامى
ه حضرتك انا امور وحليوه
وشوفت ديالا
دخلت دماغى
وقولت اكلمها
مممممممممممم
طيب ليا سؤال فى الجون يا استاذ ثومه يا حمار
ثورى ثورى
مكنش قصدى
مفكرتش تسال مين دى
ولا تسال مثلا تبع العريس والعروسه
وتشوف عيلتها مين
لو انت جاد فى الحوار يعنى
لالالا
يا مان دى حركات بطاله وقديمه
انا الف وراها
واخد بيانتها
واكلمها على النت وموبايل
ونخرج ونتفسح
وابقى شوف حكايه الاهل دى بعدين
اهااااااااااااااااااااا
يعنى انت تنح وجليط حبتين
صح صح صح عرفت منين
مين فتن
هههههههههه لا يا عسل
دى بتتعرف غيبيا
المهم انت كده حاسس انك ايه
انا
انا روش طحن جامد اخر حاجه
اها كويس
يعنى مش اهبل خالص
لالالا اهبل مين انا النجم
انا مفيش منى
لو سالت عليا
هتعرف انا مين
انا واد كول خالص
ووحيد بابا وماما
ومش مرتبط على فكره
(( وش بيغمز ))
طيبيا ننوس ماما
عقبال ما ترتبط
وتبقى اهبل كبير خالص
ومامى تفرح بيك
وتجيبلك شكليطه
يا جدعااااااااااااااااااااان
الشباب اتهبلت
يهووووووووووووووووووو
اخوكم فى الله
ميدو زنوتو اللوجنست
مراسل مدونه الشاى من على بعد خمسه كيلو من موقع الحادث
خميس ابو العافيه
قطاع الاخبار
اول مرة اخش المدونة الجامدة اخر حاجة دى وبجد موضوع وهمىىىىىىىىىى عجبنى جدا جدا
بس فى حد يلاقى دلع وميدلعش hahahahhaahhahahahahahahahhahahah
طبعا دى مش وجهة نظرى دى وجهة نظر الولاد اللى بيعملوا كده بس اعتقد ان اللى حصلك حصل لانه اعجب بيكى بهبل
تحياتى لكى
كل سنة وانتى بخير
مش قادره اقول غير ربنا يهديه
دا مجنون بجد
معلش بقى يا بنتى هنعمل ايه
انا عارفه طبعا ان الشباب اخلاقهم باظت(مش كلهم طبعا) بس مكنتش اعرف انها وصلت للدرجه دى
ربنا يهدى الجميع بقى
كل سنه وانتى طيبه يا قمر
امواااااااااااااااااااه
بس كويس انك ماعملتيش مشكله
تحياتى اللاسعه
بقه احنا كائنات رخمه...؟!
يا نهار ابيض
هى اولا طريقه التعارف بايخه شويتين
وراجعيه حبيتين
فى حاجه بقه لو كان عاملها ابوخ من كده بس انتى كنتى هتشوفيها احسن
مثلا يعنى
يبعت حد صاحبه يعمل معاكى اللى هو عمله ده واثناء رفع الشنطه يجرى هو يمسكها منك ويوقلك روحى وانتى ويمسك المدعى عليه وينفضه تنفيضه حلوه تقومى انتى على طول وبدون تفكير تحلمى بيه النهارده بالليل اول لما تروحى تنامى ويرتب معاد يشوفك فيه ويعمل اللى هو عمله ده اكيد اكيد انتى هتقبلى تتعرفى عليه وتعيشوا فى تبات ونبات وتجيبوا اجدع صبيان واحلى بنات
وكده يعنى
بقلك صحيح
اقبلى التعارف لو طلع هايف انتى تقدرى تنهى العلاقه
ولو طلع كويس ممكن يبقى صديق كويس وممكن يبقى حاجه تانيه
بس حاولى
مجرد المحاوله مفيد
وتكسبى خبرات
وتعرفى حاجات اكتر عن الجن الاخر
...
يلا بقه
.
.
مودتى :)
مقدرش يقاوم:)))
انا لو منك كنت ازق عليه جوز اختك كان هيظبطه
بس النوعيات دى بجد قليلة جداااااااااااااااااااا حظك كده
شركة مكافحة حشرات بالدمام
شركة تسليك مجاري بالدمام
شركة المثالية للتنظيف
شركة المثالية لتنظيف المنازل
شركة المثالية لتنظيف المنازل بالدمام
شركة المثالية للتنظيف بالدمام
شركة تنظيف بالقطيف
شركة تنظيف منازل بالقطيف