ربما
قبل أسبوع واحد
الخميس، 23 يوليو 2009
حاولت الفتره الي فاتت اتكلم مع نفسي كتير واسالها
ايه الحاجات الي فيا غلط الي بتخليني دايما
اكون حزينه ومكتئبه
وبجد اتكلمت مع نفسي بصراحه اوي
واكتشفت اني من زمااااان اوي بقول هتغير ومبتغيرش
ليه دايما بعامل الناس بطيبه اوي
مع انهم مش ملايكه
ليه دايما بكون جدعه اوي معاهم
مع ان عمر مافي حد كان جدع معايا
ليه دايما صريحه اوي
مع انهم بيأذوني بصراحتي دي
ليه دايما بفكر في الناس قبل ماافكر في نفسي
مع اني متاكده انهم مش بيحاسبوا علي مشاعري ابدا
ليه دايمابتنازل عن حقي لما حد بيأذني
مع انهم عمرهم مابسيبوا حقهم
ليه دايما بثق في الناس بسهوله
مع ان مفيش انسان يستاهل ثقتي
ليه انا كده؟دي طيبه ولا سذاجه مني؟
حاولت اكون غير كده كتير اوي
وكل مره هقول هتغير
بجد نفسي اكون حد تاني غيري
واعامل الناس بنفس معاملتهم
وكل مره بفشل في ده
ولو حاولت بلاقي حد تاني غيري
فعلي طول اجري وادور علي نفسي
وارجع للي كنت فيه تاني
حد فينا لازم يتغير
يااما انا
يااما الناس
لاني بجد مبقتش مستحمله اي ضغط اكتر من كده
30 Comments:
Subscribe to:
تعليقات الرسالة (Atom)
m.jpg)
و كل الحاجات اللي قولتيها جميلة ومتزعليش انها موجودة فيكي بالعكس المفروض تفتخري انك طيبة وجدعه وصريحه في زمن مبقاش في حاجه من دي موجودة يعني انتي عملة نادرة
في جملة جميلة اوي بنوتة اسمها ديدي قالتهالي قالتلي : اعملي الخير في أهله وفي خير اهله واوعي تندمي على خير عملتيه
تحمدى ربنا على كدا
ومش تحاولى تتغيرى للاوحش
ولول الناس كدا متبقيش زيهم
لان انتى بتعاملى ربنا قبل اى حد قبل ما بتعاملى الناس
اعتبرى نفسك بتعملى كدا لربنا مش ليهم وانتى هترتاحى
وربنا يهديكى ويفك خنقتك
سيبك من الناس ومن الدنيا
عاملى ربك بس
حنين
الطيبة عمرها ما كانت عيب ابدا والمكر والقسوة عمرها ما كانت ميزة ابدا
بس اى طيبة لازم لها من تقويم علشان ما تتحولش لسذاجة والتقويم ده مهمة العقل
تحياتى
الجمله الاخيره دي حلوه اوي
بس ياريت الناس كلها تعمل بيها
منوراني دايما يابنت بلدي
فعا انا بعامل ربنا بس
بس نفسي الناس تعاملني زي مابعامل الناس بس واضح اني كده بكون بحلم
بجد اسعدني مرورك
المشكله ان لما عقلي وقلبي بياخدوا قرار القلب دايما الي بيكسب لو كنت بتعامل بعقلي كنت بقيت احسن كتير بس المشكله فعلا في قلبي
نورتني بجد
ربنا يسعد كل اوقاتك يارب
وهيا الدنيا كده يا عسولة
سي لا في
علي رأي فؤاد المهندس
بس المهم إننا نطور من نفسنا عشان منوصلش للحالة دى
ربنا يكرمك ويسعدك
بس انتي بتستعمليها مع الكل
المفروض مش كل الناس تعامليهم كده عشان كده لازم شووويه تصلحي من الافراط فيهم
وصدقيني انتي الكسبانه الخير بيرجع لاصحابه :)
يبقى كونى نفسك و بس
لو اتغيرتى اتغيرى للأحسن
لو هنقول نتعامل مع الناس زيهم
طب ازاى ؟؟؟
ازاى حاجات احنا معترضين عليها نعملها ؟؟
ازاى بنتعب لما ننجرح و نروح نجرح غيرنا ؟؟
يبقى الحل نكون نفسنا و بس
مانتغيرش الا لو كان التغيير فعلا للأحسن
متحوليش تتغيرى بس حاولى تغيرى اللى حوايكى وتاثرى فيهم وتزرعى فيهم طيبتك
الأخت ديالا,
أعاننى الله واياكم على هذا الداء وهو معاملة الناس بحسن الخلق دائماً,
وإن كنت شايف انه مش داء طبعاً لانه نعمة من ربنا سبحانه وتعالى انه يمـن علينا بالخلق الحسن ومعاملة الناس بهذا الشكل لان دى معاملة الإسلام,
فى مثل كنت اسمع أمى دايما تقوله وهو,
"قال مالك متربى, قلت من عند ربى"
فالحمد لله على هذه النعمه, اللى قلما بنلاقيها وسطنا فى هذا الزمان,
خليكى على طبيعتك ديالا وحاولى تغيرى انتى فيهم على الأقل تكسبى فيهم ثواب,
وان لاقيتى نفسك مش قادرة تقاومى معاهم بالشكل ده, يبقى تبعدى عن اللى مش شايفة نفسك معاه لحد م هو نفسة يحس انه غلطان ويجيى يعتذرلك,
وان كان ولابد تغيرى فى نفسك فخلية يبقى للأحسن,
صدعتك انا عارف, :)
تقبلى مرورى,
دمتـــى بكل الود والخيـــر,,,
ده انا ملايان عيوب بس اللى مخلينى اكمل انى بصلح منها
حاولى تغيرى جو وتفكرى بصفاء مع نفسك وحاولى تعرفى انتى عايزه ايه ومش عايزه ايه
ومتخفيش يوم القيامه مش بكره لسه قدامك وقت تغيرى فيه اللى انتى عايزاه
.............................حوده
حبيبتى بجد حاسه بيكى قوووى
ومش هقدر اقولك حاجه ولا اعلق على كلامك لانى بجد نفسى حد يقولى انا صح ولا غلط
ياااااااااااااااااه
احساس صعب قووى
ربنا معانا
عندما يحين أن تتبدلي للأسوأ وقتها سيكون إحدي الاحتمالين من أي طيب
الأول
سيدعو لك بأن تعودي لما كنت عليه
الثاني
سيبتعد عنك لأنك مش بقيتي طيبة
إذاً عيشيها كما أنت ولا تخافي علي نفسك الرب موجود وعالم
من واقع تجاربي الكثيرة وشخصيتي التي تشابه تلك الصفات مع فرق العمر ..
أتمني أن يزيدك الله نقاءا وتقي
تخيل واحد تايه فى طريق ولاقى قدامه شخص فسئلة عن يوصل لنهاية الطريق ازاى فرد التانى عليه وجاوبة مثالا يمين فى شمال وبعدين ع طول
تخيل بقى بعد ما الشخص دا ماشى لنص الطريق رجع تانى لنفس الشخص وسئلة نفس السؤال نهاية الطريق دا اوصله ازاى
دا نقول عليه اية
اتمنى الفكرة تكون وصلتلك ومتزعليش لانه مهما كان فى الكون يابنتى مالهوش انه ياثر علينا للدرجة دى ويجعلنا ديما فى حزن انما النجوى من الشيطين
بصى انا عاوز اقولك عاملى كل واحد بى اللى تحسيه منه وانزلى لكل واحد بقد عقلة كدا ممكن متنخدعيش فاهمنى
اخت ىالعزيزة جداااااااااا البوست على روعة والله وطريقة صيغة وباينه انك انسان كويس الا انه قلقنى اوى انك حاطة نفسك فى دايرة محيرة اووووى
اتنمى ربنا يوافقك فى روؤية الصواب ياااارب
اختى دمتِ يارب بكل حب و ود وفى رعاية وحفظ الله دائماااااااااااا
والله كتبت تعليق طويل عريض امبارح
وشكله موصلش
معلش
نعيده تانى
انتى برضه تستاهلى
طبعا واضح جو الحزن والاضطراب النفسى اقصد يعنى التشوش الفكرى
اقصد عدم التفكير الصائب
يوووووووووووه
ايه الهبل ده
بصى هنخش على المفيد
اولا اكيد مش كل الناس كده يا ديالا
يعنى معندكيش واحده صاحبتك بس
واحده حتى
ممكن تتبادل معاكى نص الكلام ده
انتى تهتمى بيها
لانها كويسه وبتهتم بيكى
كده مثلا
انما مش كل الناس نفس النوعيه
وفى نفس الوقت
لازم تكونى حكيمه فى اتخاذ نوعيه التعامل مع الشخصيه اللى قدامك
يعنى مش كل شخص
هتعامليه بنفس الود والاهتمام
والا كده تبقى من كوكب تانى غير الارض
يارب يكون كلامى وصل
واستعوضت ربنا فى التعليق اللى ضاع
انا كل لما اجى اكتبلك تعليق مش عارف بتردد ليه يمكن زياده اعجاب بالبوستات اللى انتى بتكتبيها وبقول انى مش هقدر اوفى بكلامى فى التعبير عن اعجابى بيهم
بس المره دى انا اتجرأت وهعلق
.
.
.
.
عمرها ما كانت كده خالص
انا كما انا
لن اتغير ابدا
وأكون غيرى انا
حزين او اعيش بالهنا
يوم فرحى دائما بسنه
ويوم حزنى لا يطول
سريعا أرجع كما انا
.
.
.
هو بالزمه فى حد فى الدنيا عنده صحاب ذى اللى عندك ويحزن لحظه ....؟!
وده
أسمه
كلام
بارضه
:
:
:
يا ريت بقه تتقبلى مرورى علشان انا هدخل هنا على طول اوك
.
وعلى فكره صحيح
اسمحيلى انشر مدونتك على دليل المدونات العربيه ....
علشان التواصل يدوم
أوك ...؟!
ورده كبيييييييره خالص اد كده ليكى ولمدونتك الجميله يا قمر
:)
وليه يا حبيبتى تتغيرى
اوعى تستكترى على نفسك
عملك الطيب واخلاقك وعطائك للناس
اللى قدامك ده كويس ولا وحش دى مشكلته هو مش مشكلتك انت
ولو صادفك فى حياتك بعض الناس وكانو
مش تمام اوى مفيش مشكله وميجبروكيش انك تكونى زيهم
تقبلى تحياتى
فى حفظ الله
انك لو حاولتى تكونى حد تانى غيرك
هتفضلى طول عمرك تدورى على نفسك وهتعيشى بانفصام كبير قوى جواكى
كونى نفسك وبس
بس تكونى مرنة كتير مع الناس وتحاولى تتعاملى بذكاء معاهم
تحياتى لك
شيمو القمر
وأكيد إنتى
مش عارفه اقول ايه
ربنا يعزك ويرضى عنك ويذهب همكوجحزنك يارب
وعلى فكره انا كده بس لطيب ميزه جميله
واهداء من عند الله بس حولى تستغليها بشتى الطرق
لئن دى طريقك الى الجنه
مع الأسف
حساس زيادة
مهتم اوووى بتقييم الناس ليا
بعامل الناس بحسن نيةاووى
بس ساعات ببقى مضايق منهم
و بكتم جوايا
على فكرة الصفات اللى كتباها عايزة بس تتعدل مش تتغير
و فيه فرق كبير فى المعنى
المهم تعيشى حياتك صح
عمر الطيبه ما كانت عيب ..
ولا عمر كل اللي انتي بتعمليه ده كان غلط ..
بس الغلط
انك اتكعبلتي في شوية ناس مش كويسه ، معلش .. اكي ربنا هيعوضك .. بس انتي اختاري صح ..